इन्दर कुमारको ‘आत्महत्या’ को भिडियो भाइरल

इन्दर कुमारको ‘आत्महत्या’ को भिडियो भाइरल

सलमान खानको फिल्म ‘वान्टेड’ मा सह–कलाकारको भूमिकामा देखिएका इन्दर कुमारको जुलाई २८ मा हृदयघातका कारण मृत्यु भएको खबर आएको थियो । उनी लामो समयदेखि बिरामी भएको र उनलाई एक्कासी आधा रातमा हृदयघात भएको बताइएको थियो । ४३ वर्षको उमेरमा उनको निधनले बलिउडका कलाकार र उनका प्रशंसकलाई नराम्रोसँग धक्का दियो । अब सोसल मिडियामा एउटा भिडियो भाइरल भइरहेको छ जसलाई उनको मृत्युको ठिक अगाडि उनी आफैंले सुट गरेको बताइएको छ ।

सोसल मिडियामा छाइरहेको उक्त भिडियो देखेर उनका प्रशंसकले उनको प्राकृतिक मृत्यु नभई आत्महत्या भएको बताइरहेका छन् । उक्त भिडियोमा उनले रक्सी पिएर, रुँदै आफ्नो पीडाबारे बताएका छन् ।

उनको मृत्युको खबर आएलगत्तै विभिन्न प्रश्न पनि उठाइएका थिए । उनको मृत्युको आभाष उनलाई पहिले नै भएको पनि बताइएको थियो । वास्तवमा इन्दर कुमारले मृत्युको करिब एक वर्ष अघि सन् २०१६ मा इन्स्टाग्रामा एउटा पोस्ट राखे जसमा उनले तस्बिरसहित लेखेका थिए ‘ह्पापीनेस’, त्यसपछि उनले केही पनि पोष्ट गरेनन् ।

यस्तै, निधन हुनु एक दिन अघि अर्थात् जुलाई सन् २०१७ मा उनले एउटा तस्बिर पोष्ट गरे जसमा क्याप्सन लेखिएको थियो ‘पीस’ अर्थात् शान्ती । यद्यपी, इन्दर कुमारको यो पोष्ट उनको भेरिफाइड अकाउन्टबाट गरिएको भने थिएन । अब यो भिडियो मिडियामा आएपछि उनका प्रशंसकबीच हलचल मच्चिएको छ ।

यद्यपी, केही रिपोर्टका अनुसार उनको आत्महत्यासँग सम्बन्धित नभई उनको फिल्मको एक हिस्सा हो । यो भिडियोबारे इन्दर कुमारकी श्रीमतीले चाँडै नै पत्रकार सम्मेलन गर्न लागेको पनि बताइएको छ ।

Facebook Comments