धनगढीका व्युटीपार्लरहरुवाट मोटाउने नाममा हानिकारक औषधीको खुलेयाम बिक्री

धनगढीका व्युटीपार्लरहरुवाट मोटाउने नाममा हानिकारक औषधीको खुलेयाम बिक्री

दीपक जोशी, धनगढी

सामान्यतया व्युटीपार्लरहरुमा सौन्दर्य सम्वन्धी विभिन्न काम हुने गर्छ तर धनगढीका कतिपय व्युटीपार्लरहरु भने अवैधानिक रुपमा मोटाउने औषधी वेचविखन गरिरहेका छन् । दुव्ला मानिसहरु छोटो समयमा नै मोटाउने भन्दै उनीहरुले चिकित्सकको सल्लाह विना नै विभिन्न खालका औषधी वेचविखन गरिरहेका हुन् । तर चिकित्सकहरुले भने यस्ता औषधी अति आवश्यक परेका वेला विरामीहरुलाई मात्रै सेवन गराउन मिल्ने भएकोले अन्य व्यक्तीले प्रयोग गर्न नहुने बताएका छन् । चिकित्सकको सल्लाह विना मोटाउने प्रयोजनका लागि यस्ता औषधी सेवन गरे मानव स्वास्थ्यमा गम्भीर असर पर्ने उनीहरुको चेतावनी छ ।

चिकित्सकको सल्लाह विना प्रयोग गर्नै नमिल्ने औषधी धनगढीका व्युटीपार्लरहरुले मोटाउने औषधीका रुपमा विक्री गरिरहेका हुन् । किप्ल्याक्सन र काडीला नामक यी औषधीहरु दुव्लापात्ला युवती र किशोरीहरुलाई मोटाउने औषधीका रुपमा बिक्री भईरहेको हो । यी दुई औषधीले मासु फुलाउने र अत्यधिक मात्रामा भोक लगाउने गर्दछन् ।  श्वासप्रश्वासमा समस्या आउने लगायतका बिरामीलाई अत्यावश्यक मात्रामा मात्रै सेवन गराउन सकिने यी औषधी सामान्य मानिसले प्रयोग गर्नै नमिल्ने फिजिसियन डाक्टर शुभेषराज कायस्थले बताए ।

औषधी पसलमा १ सयदेखि दुई सय रुपैयाको एक पत्ता पाईने यो औषधी ब्युटीपार्लरहरुमा भने १५ सयदेखि २ हजार रुपैयासम्ममा विक्री भईरहेको छ । विभिन्न मेडिकलवाट खरिद गरेका ट्याव्लेटलाई धुलो पारेर आयुर्वेद औषधी हो भन्दै ठगी गरेर पनि विक्री भईरहेको पाईएको छ । यस्ता औषधीले उच्च रत्तचाप, मधुमेह लगायतका दृघरोग लाग्ने सम्भावना धेरै हुने भएकोले मोटाउने प्रयोजनका लागि सेवन नगर्न डाक्टर कायस्थले सुझाव दिए ।

व्युटीपार्लरहरुबाट बिक्री भईरहेको यो औषधी सेवन गरेमा एक महिनामा ५ किलो तौल बढ्ने हुन्छ । तर यसको फाईदा भन्दा पनि बेफाईदा धेरै भएकोले सेवन गर्न नहुने चिकित्सकहरुको भनाई छ । सौन्दर्य सम्बन्धी काम गर्ने ब्युटीपार्लरबाट औषधी बेचबिखन हुनु आफैमा गैरकानुनी कार्य हो । यसतर्फ सरोकारवाला निकायले ध्यान दिन जरुरी छ ।

Facebook Comments