सुन काण्डमा साहु फसेपछि बाजेको सेकुवा रेस्टुरेन्टका ६ वटै आउटलेटमा शिलबन्दी

सुन काण्डमा साहु फसेपछि बाजेको सेकुवा रेस्टुरेन्टका ६ वटै आउटलेटमा शिलबन्दी

काठमाडौं, ३० जेठ । सुन तस्करीको पैसा लगानी गरेको भन्दै छानबिन समितिले चेतनाथ (चेतन) भण्डारीद्वारा सञ्चालित बाजेको सेकुवा रेस्टुरेन्टका ६ वटा आउटलेटमा शिलबन्दी गरेको छ।
अदालतबाट आदेश लिई रेस्टुरेन्टहरुमा शिलबन्दी गरिएको विशेष छानबिन समितिका संयोजक गृह मन्त्रालयका सहसचिव ईश्वरराज पौडेलले बताए। उपत्यकामा बाजेको सेकुवाका १० वटा शाखा भेटिए,’ सहसचिव पौडेलले भने, ‘त्यसमध्ये ६ वटामा शिलबन्दी गर्दैछौं, अन्य शाखाको हकमा थप छानबिन हुन्छ।’

रेस्टुरेन्टका सञ्चालक भण्डारीले सुन तस्करीका नाइके चूडामणि उप्रेती ‘गोरे’सँग मिलेर तस्करीमा लगानी गरेको खुलेको थियो। उनको बैंक खाता तथा घरजग्गा यसअघि नै रोक्का भइसकेको छ। भण्डारी भने फरार छन्।
उनीमाथि सम्पत्ति शुद्धीकरणमा मुद्दामा पनि अनुसन्धान हुने समितिले जनाएको छ। सोमबार मात्र समितिले तस्करी प्रकरणमा पक्राउ परेका राजेन्द्र शाक्यको तीनै वटा सुन पसलमा छापा हानी सबै सुन तथा गहना बरामद गरेको थियो। त्यस्तै आइतबार मोहन अग्रवालको घरमा छापा हानिएको थियो।

Facebook Comments