‘साथी सबैभन्दा माथि …’


लगभग बिहानको ७ बज्दै थियो । आँखा खुल्नासाथ नजर छेउमै रहेको मोवाइलमा पुग्यो । म्यासेन्जर के खोल्न भ्याएको थिएँ, म्यासेजको घन्टी वर्षाको झरी झै बर्सियो । झट्टै म्यासेजहरु हेरेँ । जुलाई ३०, अर्थात अन्तराष्ट्रिय मित्रता दिवसको अवसरमा साथीहरुले दर्साएको माया पो रहेछ ।
मन बडो प्रफुल्लित भयो । एक अर्थमा मन दिनभरि नै नाचिरहयो । मलाई थाहा छैन यो दिवस के कसरी कहिलेबाट मनाउन लागियो । तर, यसरी धेरै जना साथीहरुले मित्रता दिवस भनेर सम्झिएको भने यो नै पहिलो पटक थियो । साथीहरुका त्यी शुभेच्छाहरु पढ्दै गएँ । प्रायः म्यासेन्जरका म्यासेजहरु एकदुई पटक पढेपछि सामान्य अर्थमा रिप्लाई दिने गर्थें । तर, आज लामा–छोटा सबै म्यासेजहरू बारम्बार पढिरहेँ किनकि तिनले यसपटक अक्षरको संरचना वा सन्देश मात्रै होइन गहिरो भावना बोकेका थिए ।

जीवनमा मैले व्यतित गरेको एउटा पलको त्यो सुन्दर प्रतिविम्ब थियो । साथीहरुका शुभेच्छासँगै उनीहरुँंग विताएका दिनहरु सम्झिए । आजसम्म आइपुग्दा मैले धेरै साथीहरुको संगत गरेको छु । साथीहरुसँग सधैँ एकनासको सम्बन्ध रहँदैन । कहिले कामविशेष र भावनाहरुले नजिकिन्छ त कहिले असमझदारीले टाढिन्छ पनि । मान्छेको मन न हो सानो कुराले जोडिन्छ अनि सानै कुराले तोडिन्छ ।

तर, मित्र जस्तोसुकै होस् अनि कारण जे सुकै किन नहोस कुनै पनि मित्रलाई गुमाउँदा आजसम्म मन रमाएको अनुभव भने छैन मसँग । साथीहरु फरक–फरक पृष्ठभूमिका हुने भएकाले होला साथीसँगको हरबसाइमा केही न केही सिक्ने मौका भने जुरिरहेको हुन्छ । फरक यत्ति हो हामी धेरैले यो पक्ष कम नै केलाउने गर्छौं । साथीहरुमा त्यस्तो के शक्ति छ म जान्दिन, साथीहरु भेट्दा मन चङ्गा हुन्छ । साथीहरु मनका भावनाहरु बिसाउने चौतारी हुन् । जहाँ मनका सकारात्मक र नकारात्मक दुवै भाव अभिव्यक्त हुन्छन् । कति साथीहरूका बिचमा प्रिय बन्छन् र फुल्छन् । कति साथीहरुका हप्की पछि बिलाएर जान्छन् त कतिले मित्रतालाई नै बिदा गर्छन् ।

मित्रता त चट्नी जस्तो होस्, धेरै कुराले बनेको चट्ट मीठो पिरो । मित्रता भावानात्मक सम्बन्ध भएकाले पनि होला यसलाई भावना कै फूलले उन्नु पर्छ जस्तो लाग्छ । वर्षौं भेट नभएको साथीसँग बाटोमा कतै भेटियो भने पनि एक कप चियासँगै मन खुल्छ । जन्मदिनमा पुरानो साथीले सम्झिएर शुभकामना पठायो भने, जन्मदिन यसै विशेष बन्छ ।

कामको शिलशिलामा भौतारिँदै गर्दा कतै आफ्नो साथी भेटियो भने आनन्द मिल्छ । जीवन गतिशील छ । यो गतिशीलताको वेगसंगै हिड्नुको विकल्प छैन । जिन्दगीका अनगिन्ती मोडहरुमा अनेकन पात्रहरु साथी बन्छन्, कोही जुट्छन् त कोही फुट्छन् तर पनि यादहरु ताजै रहन्छन् । र, लाग्छ यस्तै कुराहरुले जीवनलाई जीवन्त राख्छ ।

मानवीय स्वभाव न हो हामी केही कुरालाई गुमाई सकेपछि मात्रै त्यसको महत्व बुझ्छौँ । र फर्किएर हेर्दा जुन कुराले हामी पहिले हाँसेका थियौं, आज त्यही कुराले रुने गर्छौं । कलेज गएपछि स्कुले साथीहरुको महत्व बारे बुझेँ । सायद अब कलेज सकेपछि कलेजका साथीहरु बारे बुझौंला । पछि जागिरे साथी जोडिएलान । यो क्रम यसै गरी नै चल्ला र पनि जीन्दगी त साथीकै साथ या त याद । यही दुईको दोसाँधमा चलिरहेछ ।

आजभोलि त सामाजिक संजालमा पनि साथीहरु जोडिन्छन् । कोही चैते हुरी जस्तो मौसममा एकपटक स्पर्श गरेर जान्छन् त कोही निरन्तर वगिरहने वायु जस्तो प्रत्येक पटक स्पर्श गर्छन् । चिन्ताचासो पोखिरहन्छन् । मैले बुझेकोमा बा–आमा सबैभन्दा नजिकका साथी हुन् । आमाको काखमा बसेर कुरा लुकाउन सकिदैन त बा’को साथ बिना जीन्दगीमा मुस्कुराउन । सबैको प्रिय छ त्यो बालापन–जहाँ कहिले साथीका लागि आफूले गाली खाइयो त कहिले आफ्नालागि साथीले ।

घरमा धेरैपटक वहानाहरु बने खेल्न र डुल्न जान । साथीका जन्मोत्सव मनाउन, नयाँ कपडा किन्न, मामाघर जान । आखिर समय कै खेल, हिजो चाहनाहरु पूर्ति गर्न वहानाहरु थिए । आज चाहनाहरु पनि छन्,त्यसैको परिमाणमा वहानाहरु पनि छन् । तर पनि चाहना र वहाना यी दुवैमा साथीको सुगन्धको मिठास छैन् । हिजो भाँडकुटी खेल्ने साथी थिए, आज सहपाठी छन् । भोलि सहकर्मी अनि जीन्दगीका त्यी अन्तिम दिनहरु कटाउन घाम ताप्ने साथीहरु । आखिरमा जीन्दगी साथीकै वरिपरि घुम्दो रहेछ । जब खाली हुन्छु, यस्तै यस्तै कुराहरुले मनको पिङ्गमा मच्चिन खोज्छन् । अक्षर बनेर डायरीका पानाहरुमा कोरिन पुग्छन् अनि फर्किएर कुनै दिन पढ्न पुगेँ भने फेरि यिनै शब्दहरु मुहारमा मुस्कान बनेर झझल्किन्छ । मित्रता सबैको सधैं अमर रहिरहोस् ।

भर्खरै प्रकाशित

रोट्र्याक्ट क्लव अफ भरतपुर हाईटको पदस्थापना सम्पन्न , वर्ष २०२१-२२को…

रोट्रयाक्ट क्लब अफ भरतपुर हाईटले आफ्नो तेस्रो पदस्थापना समारोह भव्यताका साथ सम्पन्न गरेको छ। रोटरी क्लव अफ भरतपुरद्वारा स्पोन्सर गरिएको यस क्लव निस्वार्थ भावनाले समाजलाई…

आत्महत्या सम्बन्धी सचेतनामुलक कार्यमा रोट्र्याक्ट क्लब राजधानीको पहल।

आत्महत्या सम्बन्धि समाचार र खबर हालको आवस्थामा दिनकै जसो सुन्दै र देख्दै आइरहेको कुरामा हामी सबै जानकार नै छौं । यसै पनि संसारको बढी मृत्यु…

रोट्याक्ट क्लव अफ लेखनाथद्वारा खाद्यान्न वितरण तथा स्वस्थ्य शिबिर कार्यक्रम…

रोट्याक्ट क्लव अफ लेखनाथद्वारा मिति २०७८ भाद्र २३ गते बुधबारको दिन तीजको अवसरमा पोखरा -२७ स्थित श्री कृष्ण प्रणामि मन्दिर तथा वृद्धश्राम खाद्यान्न वितरण तथा…

नेपाली कांग्रस कास्की क्षेत्र नं. २, प्रदेश ख का लागि…

नेपाली कांग्रेसको आसन्न १४ औं महाधिवेशनमा पोखराका सामाजिक अभियन्ता सुबास सिग्देलले नेपाली कांग्रस कास्की क्षेत्र नं. २, प्रदेश ख का लागि सभापति पदको लागि उमेद्वारी…

लोकतान्त्रिक शैक्षिक परामर्श संघ लुम्बिनी प्रदेशमा दिनेश पौडेल

लोकतान्त्रिक शैक्षिक परामर्श संघ लुम्बिनी प्रदेशमा दिनेश पौडेलको संयोजकत्वमा १८ तदर्थ समिति गठन भएको छ । नेपाली कांग्रेस निकट शैक्षिक परामर्श व्यवसायीहरुको भेलाले उक्त निर्णय…