वीरगञ्ज – स्वतन्त्र विधार्थी युनियन (स्ववियु) निर्वाचनको विषयलाई लिएर वीरगञ्जको ठाकुरराम बहुमुखी क्याम्पसमा शुक्रबार गरिएको आगजनीको घटनामा संलग्न रहेको आरोपमा पक्राउ परेका विधार्थी नेताहरु रिहा भएका छन् ।
निर्वाचन समितिले प्रकाशन गरेको मतदाता नामावलीको विषयलाई लिएर विवाद हुदा केहि विधार्थीले शुक्रबार दिउँसो क्याम्पसको विधार्थी कल्याण तथा खेलकुद शाखामा आजगजनी गरेका थिए ।
उक्त घटनामा संलग्न रहेको आशंकामा प्रहरीले नेकपा एकिकृत समाजवादी निकटको अनेरास्ववियुका नेता सुजित गीरी ,नेकपा एमाले निकट नेपाल खेलकुद महासंघ ठाकुर राम क्याम्पस ईन्चार्ज मनिष चौहान र अनेरास्ववियु क्रान्तिकारीका विद्यार्थी नेता शिवम साहलाई नियन्त्रणमा लिएको थियो ।
प्रहरीले नियन्त्रणमा लिएका तीनै जना विधार्थी नेतालाई शुक्रबार नै साँझ रिहा गरेको हो । क्याम्पस प्रमुख डाक्टर उमेश चौरसियाले क्याम्पसको आन्तरिक विवाद आफै सुल्झाउने भनेपछि तीनै जना विधार्थीलाई चौरसियाको जिम्मा लगाएर पठाइएको पर्साका प्रहरी प्रवक्ता प्रहरी नायब उपरीक्षक दिपक गिरिले बताए ।
निर्वाचन समितिले फागुन २१ मा प्रकाशन गरेको मतदाता नामावलीको विषयलाई लिएर भएको विवादका क्रममा विधार्थीहरुले शुक्रबार क्याम्पसको विधार्थी कल्याण तथा खेलकुद शाखामा आजगनी गरेका थिए ।
शुक्रबार दिउँसो क्याम्पसको सभाकक्षमा क्याम्पस प्रमुख , निर्वाचन अधिकृत र विधार्थी संगठनका नेताहरु बिच मतदाता नामावलीका विषयमा उत्पन्न विवादका बारे छलफल भइरहेका बेला केहि विधार्थीहरुले विधार्थी कल्याण तथा खेलकुद शाखामा पेट्रोल छर्केर आजगनी गरेका थिए । आजगजनीबाट शाखामा रहेका फर्निचरहरु जलेका छन् ।
आजगजनीको घटनापछि शनिबारका लागि निर्धारति मनोनयन पत्र दर्ता कार्यक्रम सहित त्यसपछिका निर्वाचन कार्यतालिका हालका लागि स्थगीत गरिएको छ ।
मतदाता नामावलीका विषयमा विधार्थी संगठनहरुले छानबिनका लागि राखेको मागलाई मध्यनजर गरि क्याम्पसका प्राध्यापक रघुनाथ प्रसाद चौरसियाको संयोजकत्वमा छानबिन समिति गठन गरिएको निर्वाचन अधिकृत रोशन लामिछानेले बताए । उक्त समितिमा प्राध्यापक संघ , कर्मचारी संघ , लेखा शाखाका कर्मचारी , विधार्थी संघसंगठनका प्रतिनिधी र जिल्ला प्रशासन कार्यालयका प्रतिनिधीलाई समेत सदस्यका रुपमा राखिएको छ ।
निर्वाचन अधिकृत लामिछानेका अनुसार , उक्त समितिले ३ दिन भित्र (फागुन२९ गते भित्र) फागुन २१ मा प्रकाशीत मतदाता नामावलीको छानबिन गरि प्रतिवेदन बुझाउने छ । त्यसपछि उक्त प्रतिवेदनका आधारमा अन्तिम मतदाता नामावली प्रकाशीत गरि पुन अर्को निर्वाचन कार्यतालिका प्रकाशन गरिने लामिछानेले जानकारी दिए । उनले त्रिभुवन विश्व विद्यालयले निर्धारण गरेको चैत ५ मा हुने मतदान भने प्रभावित नहुने गरि आफुहरु अगाडि बढ्ने पनि प्रष्ट पारे ।
निर्वाचन समितिले फागुन २१ मा प्रकाशन गरेको मतदाता नामावलीमा १० हजार २३२ जना विधार्थीको नाम समावेश थियो । तर विधार्थी संघसंगठनहरुले उक्त नामावलीमा करिब ८ सय फर्जि विधार्थीको नाम समावेश गरिएको भन्दै शुक्रबार विवाद गरेका थिए । क्याम्पस प्रमुख , निर्वाचन अधिकृत र विधार्थी कल्याण शाखाका प्रमुखले आफु निकटका विधार्थी संगठनलाई जिताउने नियतले ८ सय फर्जि विधार्थीको नाम मतदाता नामावलीमा समावेश गरेको नेविसंघका क्याम्पस इकाई समिति सभापति मनोज कुमार साहले आरोप लगाए ।
यहाँ प्रकाशित कुनै समाचारमा तपाईंको गुनासो भए हामीलाई info@nepaliprofile.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक र ट्विटरमा पनि जोडिन सक्नुहुन्छ । हामीसँग तपाईं फेसबुक र ट्विटरमा पनि जोडिन सक्नुहुन्छ ।
यो खबर पढेर तपाईलाई कस्तो महसुस भयो ?
