वीरगञ्ज । पर्सा प्रहरीले ठूलो मात्रामा कम्प्युटर, ल्यापटप लगायतका अवैध इलेक्ट्रिक सामग्रीहरू नियन्त्रणमा लिएको छ ।
विशेष सूचनाको आधारमा जिल्ला प्रहरी कार्यालय पर्साबाट खटेको प्रहरी टोलीले वीरगञ्ज – ५ स्थित एडी कम्प्युटर सप्लायर्सका सञ्चालक अजय सिंहको घरबाट भन्सार छली चोरी पैठारी गरेर ल्याइएको कम्प्युटर, ल्यापटप लगायतका कम्प्युटर र इलेक्ट्रिक सामग्रीहरू बरामद गरेको हो ।
बरामद सामग्रीको अनुमानित बजार मूल्य ५१ लाख २६ हजार ७ सय रुपैयाँ रहेको जिल्ला प्रहरी कार्यालय पर्साका प्रवक्ता एवम् प्रहरी नायव उपरीक्षक (डिएसपी) कुमार विक्रम थापाले जानकारी दिए ।
डिएसपी थापाका अनुसार अजय सिंहले आफ्नो चार तल्ले घरमा अनधिकृत रूपले भन्सार छली चोरी पैठारी गरी ल्याएका कम्प्युटर, ल्यापटप तथा इलेकट्रोनिक्स सामानहरू भण्डारण गरेर राखेको भन्ने विशेष सूचनाको आधारमा वडा प्रहरी कार्यालय बिर्ताका प्रमुख प्रहरी निरीक्षक (इन्स्पेक्टर) पुष्कर बोगटी नेतृत्वको प्रहरी टोलीले छापामारी गरेको थियो । छापामारी गर्ने क्रममा सिंहको चार तल्ले घरको भुईँ तल्लामा सूचना अनुसार नै बिलबिजक नभएको कम्प्युटर, ल्यापटप तथा इलेकट्रोनिक्स सामानहरू अनधिकृत रूपमा भण्डारण गरेर राखिएको पाएको थियो ।
प्रहरीले सिंहको घरमा डेल मिनी सिपीयु ७० थान, सिस्टम बिनाको डेल मिनी सीपीयु ३० थान, बिना सिस्टमको डेल सीपीयु बक्स ४१ थान, डेल सिपीयु बक्स ६० थान, डेल सिपीयु सेट ७६ थान, जियोनिक्स हार्डडिक्स ८८ थान, डेल मनिटर ४२ थान, माउस ५ सय ५० थान, मनिटरको तार ३ सय १२ थान, सीसीटिभीको तार १८ हजार मिटर, मदरबोर्ड २५ थान, ग्राफिक कार्ड ११ थान, कुलीङ फ्यान १९ थान, ल्यापटपको चार्जाज १ सय ३१ थान, क्याट – ६ तार एक रोल र ड्रिल मेसिन एक थान बरामद गरेको डिएसपी थापाले जानकारी दिए ।
प्रहरीले बरामद गरिएका सामग्रीहरू आवश्यक कारबाहीका लागि राजश्व अनुसन्धान कार्यालय पथलैयामा बुझाइएको डिएसपी बताए ।
यहाँ प्रकाशित कुनै समाचारमा तपाईंको गुनासो भए हामीलाई info@nepaliprofile.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक र ट्विटरमा पनि जोडिन सक्नुहुन्छ । हामीसँग तपाईं फेसबुक र ट्विटरमा पनि जोडिन सक्नुहुन्छ ।
यो खबर पढेर तपाईलाई कस्तो महसुस भयो ?
